Сайн уу, Намайг Нямдоржийн МӨРӨН гэдэг!

Яагаад би ментор болъё гэж шийдсэн юм бэ, яагаад гэвэл би бизнес эрхэлж байхдаа асар их ганцаардлыг мэдэрдэг байсан. Бор зүрхээрээ, хэн нэгний дэмжлэг, хөрөнгө оруулалт, заавар зөвлөгөөгүйгээр л ганцаараа бүгдийг хийж ирсэн. Үүнийг зөв гэж яагаад ч хэлэхгүй. Асуудал тулгарах болгонд өвдгөө тэврээд яаж ард нь гарах вэ гэж уйлж суудаг байсансан.

Асуудлаа давж гарахын тулд уншина, суралцана, тэгэх бүр энийг өмнө нь мэдэж байхгүй яав даа гэдэг харамсал байнга төрнө. Эргээд өөрийнхөө амьдралыг харахаар болохгүй, бүтэхгүй гэсэн хаалга бүрийг онгойлгож үзээд шархадсан хүн шиг л санагддаг юм.

Тэгээд яг над шиг хүсэл мөрөөдлөөрөө хувийн бизнес эхлүүлэхийг хүсч байгаа, магадгүй миний туулаад ирсэн асуудал бэрхшээлийн өмнө зогсож байгаа хүмүүст ингэж болдоггүйн байна шүү, ингэвэл алддаг шүү гээд анхааруулах, бизнесийнх нь хувьд байж болох зөв шийдлийг хамтдаа олох, ганцаардлыг нь хуваалцах гэж ментор болсон юм.

Ментор гэдэг нэр надад ахдаж магадгүй л дээ. Гэхдээ үүн дээр би бодсон юм. Би ментор болсныхоо дараа ментор хийе гэсэн бол өнөөдөр 2000 гаруй хүнд хүрч чадсан Амжилтын стратеги сургалт маань байхгүй байх байсан. Өдөр бүр хүлээн авдаг талархлын захидлууд маань ч байхгүй байх байлаа. Тэдгээр хүмүүсийн амьдралд жоохон ч гэсэн өөрчлөлт, гэрэл тусгасан учраас л талархлаа ирүүлдэг биз.

Яг үүн шиг хэрвээ алдар нэртэй дуучид "би алдартай дуучин болчихоод дуу дуулъя" гэсэн бол тэд хэзээ ч тийм гайхалтай бүтээлүүд хийгээгүй байгаа. Тийм болохоор одоо хэн байгаа нь чухал биш, хэн болохоор тэмүүлж байгаагаараа үйлдэх чухал юм байнаа гэдгийг ойлгосон.

Мөрөөдөлдөө хүрэхэд тань, хувийн бизнесээ эхлүүлэхэд нь туслахдаа би баяртай байх болно.